لما هو عادي ... طيب ليه ؟

إنسحاب الشرطة ... عادي دايما بيحصل كده في الثورات
إنفلات أمني ... عادي هو انت عايز البلطجية مايلاقوش شرطة وما ينتهزوش الفرصة ؟
ترويع إعلامي كاذب للمواطنين ... عادي مش دول إعلام أمن الدولة ؟
روح المسجد الحرام في ميدان التحرير ... عادي هم دول المصريين لما يتجمعوا على هدف واحد
الجيش ينحاز الى صف الشعب ويسقط مبارك ... عادي ياإبني ما هو ده جيش مصر
اللواء الفنجري يحيي أرواح الشهداء تحية عسكرية ... عادي .. بس إستنى أنشف دموعي
القبض على رموزالفساد في نظام مبارك ... عادي هي دي نيابة وقضاء مصر الشامخ
المستشار البشري يرأس لجنة التعديلات الدستورية ... عادي وهم حيلاقوا حد زي طارق البشري
الدعاية المتطرفة لنعم أو لا تأخذ أشكالا غير جيدة ... عادي مادامت آراء فقط فلا بأس مهما كانت
الملايين تزحف على صناديق الاستفتاء ... عادي .. هو انت صدقت نظيف وعمر سليمان لما قالوا الشعب مش واعي؟
الأغلبية الساحقة تقول نعم ... عادي هي دي الديموقراطية في أنصع صورها
الأقلية العددية ترفض نتيجة الاستفتاء وتتهم الشعب بالجهل ... عادي فيه ناس قليلة الأدب في كل الشعوب حنعمل إيه؟
صدور الإعلان الدستوري من المجلس العسكري ... عادي ماهي دي الخطوة الطبيعية لخارطة الطريق
تصاعد أحداث الفتنة الطائفية ... عادي هو انت نسيت أيام المخلوع كانت المواضيع دي مولعة إزاي؟ على الأقل فيه اللي بيطفيها دلوقتي
الناس بتطالب بسرعة المحاكمات للقتلة والمفسدين ... عادي حقهم وانت عايز تقعد تحاكمهم عشر سنين ؟
القضاء يرفض محاولات الضغط عليه أو تسييسه ... عادي علشان العدل وكل واحد ياخد حقه
الضباط المتهمين بقتل الشهداء مطلقي السراح ويمارسون عملهم ... عادي هم خاضعين للتحقيق ولما يُدانوا يتحبسوا
عودة الاعتصامات الفئوية في مناطق مختلفة ... عادي الاعتصام حق من حقوق المواطن للتعبير عن رأيه
حركة المحافظين تثير غضب الشارع الثائر أصلا ... عادي وهي دي أشكال اللي جايبينها؟ لازم الشعب يرفضها
المعترضون على محافظ قنا يقطعون السكك الحديدية لعدة أيام ... عادي ماهم اعترضوا وماحدش عبرهم يعملوا ايه ؟
اعتصام أمام ماسبيرو من بعض الأقباط ... عادي ما انت عارف إن الأقباط ليهم مطالب، وكثير منها عادل، ومطنش ..قابل
تباطؤ .. تباطؤ في كل شيء ... عادي ياجماعة مصر بلد كبيرة والنظام الساقط ماليها فخاخ لإفشال أي محاولة إصلاح
أهالي الشهداء يعانون في صرف مستحقاتهم وأهالي المصابين دايخين بولادهم بينطردوا من مستشفى لمستشفى ...عادي إنتم ناسيين إن البيروقراطية من أكبر مشكلات مصر ولسه اتباعها المخلصين بخير .. نصبر شوية
توجيه اتهامات وانتقادات للمجلس العسكري ... عادي مادام يمارس عملا سياسيا وليس عسكريا
عودة المظاهرات لشباب ثائر في التحرير والسويس وغيره ... عادي لأن الفاعليات الكثيرة بعد الثورات يطلق عليها حالة السيولة الثورية وهي أمر عادي
استدعاء صحفيين وإعلاميين للتحقيق معهم في انتقادات وجهوها للمجلس العسكري ... عادي مش لازم يعرفوا حقيقة التهامات دي لإن المتهمين عسكريين وبعدين المهم إن مافيش حد منهم إتحوِّل لمحكمة عسكرية
دعوات لمليونيات لباها الآلاف في التحرير ... عادي مش لسه فيه مطالب ما اتحققتش
دعوة لمليونية الثورة أولا لجمع الثوار مرة أخرى وترك المختلف فيه ... عادي لازم الناس تفضل تضغط طالما فيه مطالب لم تتحقق
فيه شباب قرروا يعتصموا في التحرير تاني وقفلوا الميدان ... عادي المفروض انك اتعودت خلاص على حكاية الاعتصامات دي وقفلوا الميدان لإنهم خايفين حد يخترقهم ويعمل مصيبة ويلبسها لهم
الإخوان لم يشاركوا في الاعتصامات ... عادي كل واحد ليه وجهة نظر وكل واحد له أسلوبه وكل واحد حر
المعتصمين قفلوا مجمع التحرير وعطلوا مصالح الناس ... عادي جدا إن كل تجمع يكون فيه متطرفين ويعملوا حاجات غلط بس نفهمهم مش نعلق لهم المشانق
المعتصمين بيشتموا المجلس العسكري وبيطالبوا بإقالة المشير ... عادي جدا إن الناس ما يعجبهاش أداء المجلس السياسي ولا رئيسه ماتنساش إن الناس دي لسه مطيرة رئيس مصر السابق فعادي تنتقد القائم بأعماله اما الشتيمة فزي ما قلت لك قبل كده عادي إن كل ناس يكون فيهم أقلية قليلة الأدب مصيرهم يتربوا المهم إن ده مش رأي الأغلبية
المعتصمون بيهددوا يقفلوا البرصة والمترو والكباري وقناة السويس و... و.... ... عادي هو الكلام عليه جمرك .. كبر مخك
المعتصمون علقوا بلطجية عريانين على العواميد ... عادي هو أي حد في مصر بيمسك حرامي بيعمل في اللي جابوه إيه ؟ ولا مرة واحدة بقينا كلنا حنينين؟ دي ثقافة شعب قدامها كتير علشان تتغير .. اصبر
فيه ناس في التحرير بتتلقى تمويل وتدريب من الخارج ... عادي إن أي حد يقول أي كلام ويتهم أي حد بيخالفه واللي معاه دليل يقدمه للنيابة .. والغلطان يتعاقب بالقانون سواء المتهِم أو المتهَم
الحكومة الجديدة مش أحسن بكتير من اللي سبقتها ... عادي مش اللي مشكل الاتنين د.عصام شرف يعني عقلية واحدة وبعدين لما حب يجيب من ترشيحات الثورة اعتذر الافندية .. خايفين .. طيب يجيب منين؟
المعتصمون يسيرون مظاهرة لوزارة الدفاع للاحتجاج على أداء المجلس العسكري ... عادي للمرة المليون المظاهرات عادي والنقد عادي
الجيش يمنع المتظاهرين من إكمال المظاهرة ويغلق الطرق ... عادي إن السلطة ترى إن المظاهرة تتوقف عند نقطة معينة لاعتبارات أمنية يرونها ولكن لا تعتدي على المتظاهرين
أهالي غاضبون وبلطجية يعتدون على المتظاهرين ... عادي إن الناس تخاف يتوقف حالهم زي حال محلات التحرير وعادي إن الفلول تأجر بلطجية لضرب المتظاهرين
التيار الإسلامي يدعو الى مليونية بجد في التحرير ... عادي التحرير بتاعنا كلنا .. يشرفوا .. يمكن روح ميدان التحرير ترجع له تاني

*****

لما كل ده عادي وتوقع يحصل زي ما حصل في كل بلاد الدنيا اللي قامت فيها ثورات
لما يكون بلد مقفول عليها بتتحكم بالحديد والنار حكم ديكتاتوري جائر لمدة 60 سنة متواصلة
لما يكون ده أداء بلد ليس بها مجلس نيابي ولا حكومة منتخبة ولا محليات ولا رئيس ولا دستور ولا فلوس ولا صديق
لما يكون كل حاجة بتتعمل علشان توقع البلد بتفشل وتتكشف
لما يكون فيه شعب بيحب قواته المسلحة مهما كان معارضا لدور قادتها السياسي كل هذا الحب
لما يكون لأي تصرف حصل وبيحصل في البلد وجهة نظر .. قد نختلف معها ولكنها تظل وجهة نظر وليست خيانة
حاجات كتير جدا ممكن نقول عليها ولما ولما ...
ليه اليأس .. ليه الخنقة .. ليه كل يوم بنحس إننا رايحين في داهية والمستقبل إسود ؟

فاضل إيه علشان نتأكد إن اللي قوِّم الثورة ... ونَجَّح الثورة ...
مازال يحمي الثورة
فالله أكبر ... الله أكبر ... الله أكبر ولله الحمد
الله أكبر وتحيا مصر
الله أكبر ويحيا شعب مصر
الله أكبر ويحيا جيش مصر